Day 5 (29/12/2010) – Lodge Paine Grande -> Refugio Grey, 11km
昨晚瞓得唔好，今早7點幾起身食早餐。同昨日一樣嘅 packed lunch，一樣無拎三文治。9點幾起步去今天入住嘅 Refugio Grey。
喺 Park Office 旁嘅山徑上山，經過湖水清澈的 Laguna Log Pasas 時，看見橙紅色綠色的水草在水中〝飄揚〞。之後行上山頂，可以睇到冰川湖 Lago Grey，湖水果然係灰白色嘅，有好多塊大嘅藍冰飄浮喺湖面。
一小時後到咗第一個 Maridor，可以睇見百內最大的冰川 Glaciar Grey。因為嚟百內前喺 El Calafate 去過阿根廷睇 Perito Moreno Glacier，呢度嘅 Glaciar Grey 明顯比較細。Maridor 嘅位置好大風，不可久留。喺呢度同昨日嘅大陸夫妻分手，佢哋會返 lodge 旁嘅碼頭坐船走。
接落嚟嘅一段較多上落，仲要過幾條小溪。途中仲見到一隻鞋底。。。
下午一點幾到湖邊嘅 Refugio Grey。呢度有兩人房同八人房，兩人房有一張碌架床，八人房有四張碌架床，全部房間都喺樓上。因為兩人房早已有人入住，我哋要住八人大房。
放低行李到樓下嘅餐廳食我哋嘅 packed lunch，Refugio 嘅 staff 好好人，免費請我哋飲咖啡。
午餐後去 Refugio 附近嘅 Maridor 睇冰川。喺岸邊有好多喺冰川溶出來嘅大冰塊，形狀古怪，居然有雀仔喺冰面上搵食。
湖邊有一對雁 (Ashy-headed Goose)，雄雁見我哋走近，立即鬆毛鬆翼，發出咕咕嘅叫聲，一幅戰斗格。但係隻雌雁一于少理繼續吃草。
睇完冰川返木屋沖涼，我哋今晚嘅同房都到咗，佢哋係一對來自以色列嘅年青新婚夫婦。好開心今晚只有四個人同房。更諗唔到嘅係呢度嘅花灑同水温比昨晚好，可能因為人少。
Refugio 嘅 campesite 就喺木屋旁邊嘅沙灘上，今日只有幾個營，好清靜舒服。喺營地同一位新加坡嚟嘅山友分享心得，佢哋想多啲自已嘅空間唔想同陌生人同房所以選擇住帳幕。
今晚晚餐有湯、燜牛肉配薯蓉和朱古力布甸。
