24-Sep 星期日
今天要行十一、二公里到高度3720米嘅 Horombo Hut。
我們九點起程，往上行咗20分鐘左右，導遊 Filax 帶我們行上 Maundi Crater， 一個其他導遊不會帶遊客去嘅小火山口。環繞火山口有一圈白雲，企喺火山口邊可以遠眺東面嘅肯亞同西面嘅 Moshi。近看火山口有一個長滿小草嘅斜坡，可能宜家係旱季，草呈黃色。
喺火山口返到去 Horombo Hut 嘅山路， 繼續往上行。沿路嘅風景無咩好睇，所見多係矮灌木，我一直叫悶。上山嘅路係沙泥路，一路上都沙塵滾滾，太陽又曬，大家好快就滿身泥塵汗水。
大約下午兩點到達 Horombo Hut。呢度嘅山小屋同 Mandara Hut 一模一樣。途中同伴開始頭痛，都係高山症發作。到咗 Horombo Hut 後無幾耐，同伴將午餐嘔返出嚟，然後發咗一個多小時呆，頭痛先有減輕嘅跡象。傍晚時竟然有胃口食晚餐，比起去西藏時好得快咗好多。
今日同另外一對歐洲夫婦同房，佢地話佢地嘅國家喺意大利同奧地利中間嘅一個小國(回港後先知道係Slovenia 斯洛文尼亞)，聽完國家嘅名，完全無頭緒。他們已經登完頂準備明日落山。嗰個女人話登頂遠比她想像嘅困難。夫妻兩人睇嚟好累，幾乎用盡所有嘅時間瞓覺，心諗落山嗰日大概我都係一樣。
25-Sep 星期一
今天會喺 Horombo Hut 住多一日，因為可以多一啲時間去適應高度。昨晚同伴瞓得特別好，但係到我高山症發作，凌晨一點幾已經頭暈瞓唔着。
早上八點半要起程去3.4公里外4100米高嘅 Zabra Rocks，是高山登山嘅適應練習。沿途所見都係好似菠蘿嘅樹同一堆堆小太陽花。
我們只係用咗一小時四十五分鐘來回，之後成日都係無所事事，好後悔無帶本書上山，都是因為行李問題無足夠時間執上山需要用嘅嘢。
到今天已經有三日無洗頭沖涼，忍不住要洗頭。由於沒帶洗頭水，只用清水洗頭，洗咗都唔覺得干淨，只好忍住。
